Rritja e numrit të fëmijëve të prekur nga diabeti është kthyer në një problem si për mjekët ashtu edhe për familjarët. Bluzat e bardha pohojnë se në 5 vitet e fundit ka një rritje të ndjeshme të diabetit tip I, tek të vegjlit, dukë shënuar 25 deri në 30 raste të reja çdo vit.
Por nga ana tjetër edhe familjarët e këtyre fëmijëve kërkojnë më shumë mbështetje nga shteti, sa i përket rimbursimit edhe të materialeve të mjekimit, të cilat kapin një kosto vjetore prej 480 mijë lekë në vit për çdo fëmijë.
“Përveç ilaçeve të cilat rimbursohen nga shteti, të 800 fëmijët që vuajnë nga diabeti kanë nevojë për materiale mjekimi siç është përdorimi i ageve në gjatësi të ndryshme për mosha të ndryshme që janë me diabet. Po kështu kosto kanë edhe testet e glicemisë, për matjen e sheqerit në gjak” pohon Asim Toro, kryetar i Shoqatës së Fëmijëve dhe të Rinjve me diabet. E ndërsa drejtuesit e shoqatës kërkojnë mbështetje nga shteti, bluzat e bardha japin alarmin e të prekurve nga diabeti.
“Tek fëmijët kemi dy lloje diabetesh, tipi i parë që kërkon insulinë, dhe diabeti tipi i dytë. Tek fëmijët dominon kryesisht diabeti tipi i parë. Kohët e fundit është vënë re se me rritjen e shpeshtësisë së rasteve, është rritur ndjeshëm diabeti i tipit të dytë që lidhet me diabetin. Në 5 vitet e fundit numri i fëmijëve me diabet tipi i parë është rritur ndjeshëm dhe mesatarisht ka mbi 25-30 raste të reja në vit” tha Laurant Kollçaku, mjek pediatër endokrinolog në QSUT. Sipas tij, obeziteti renditet i pari ndër faktorët, por ndikues është edhe faktori gjenetik, apo streset që mund të kalojë një fëmijë në ambientin familjar. “Rastet më shpesh konstatohen tek fëmijët e moshave 0-7 vjeç dhe grupi i dytë është mosha 10 edhe sipër.
Në grupin e parë shpejtësia lidhet me shpeshtësinë e madhe të infeksioneve virale të rrugëve të sipërme respiratore apo edhe të poshtme respiratore, me infeksionet e traktit gastrointestinal. Në grupin e dytë të diabetit shpeshtësia lidhet me fillimin e një rezistence fiziologjike normale ndaj insulinës” pohon mjeku endokrinolog. Sipas tij, problem sot është mungesa e informacionit nga ana e prindërve të cilët i sjellin shumë vonë fëmijët për diagnostikim. Ata rekomandojnë kryerjen e analizave rutinë në qendrat shëndetësore, në momentin e shfaqjes së simptomave të para, si urinimi i shpeshtë, pirja e ujit pa kriter, rënia në peshë etj.
Burimi: BotaSot
No comments :
Post a Comment