Edhe Nokia i dorëzohet Android-it

Së shpejti Nokia do të hedhë ne treg një telefon inteligjent me sistem operimi Android i quajtur “Normandy”.

Për “Normandy” kemi dëgjuar në muajin tetor si një projekt i lënë përgjysmë i kompanisë finlandeze për shkak të vështirësive financiare dhe rënies drastike në treg, që e detyroi atë të shiste sektorin mobile tek “Microsoft”.

Tre vjet më parë, Nokia hoqi dorë nga sistemi i vet i operimit të telefonave i quajtur “Symbian” dhe i besoi “Windows Phone”. Por parametrat e një sistemi “Windows” kërkojnë një telefon me kosto të lartë që rrisin cmimin kur dalin në treg.

“Normandy” nga ana tjetër është një projekt “low cost”, i nisur si një varkë shpëtimi për Nokia-n përballë konkurencës së iPhone dhe Samsung. Ky projekt nuk plotëson kushtet minimale për të operuar me “Windows Phone”, ndaj Nokia ka shtrirë dorën e bashkëpunimit tek Android-i i Google.

Meqë “Normandy” është bërë gati para se “Microsoft” të blinte sektorin mobile të kompanisë finlandeze, bashkëpunimi me Android nuk ka pse kërkon ‘lejen e Bill Gates’, i cili brenda pak javësh pritet të ketë nën kontroll të plotë të gjithë sektorin e telefonave të Nokia-s.

Android është sistemi më i përhapur në tregun e telefonave inteligjentë, aq sa edhe rivali i tij më i ashpër, Apple me iOS nuk përjashtoi mundësinë e ndërtimit të një pajisje me të tillë sistem.

Burimi: YllPress