12 July 2014

Sekrete për t’u qetësuar në fund të ditës

E kush do të ishte ai ose ajo që nuk do të donte të qetësohej plotësisht pas një dite të lodhshme pune e me strese! Ne këtë herë ju sjellim disa sekrete.

Të qeshësh! 


A e dini se e qeshura tonifikon muskujt, çliron energjitë negative, oksigjenon muskujt dhe indet, neutralizon stresin, ankthin dhe rrit fuqinë e përgjithshme fizike? Sipas një studimi të kryer në Shtetet e Bashkuara, në vitet ’50 personat qeshnin mesatarisht 45 deri në 60 minuta, ndërsa sot të qeshurat kanë rënë në një mesatare prej 15 minutash në ditë. Film cilësor, teatër, lojëra me fëmijët dhe jo vetëm: të qeshurat zbulojnë kapacitetin tonë për të vazhduar për të “luajtur” me jetën, ta marrim veten dhe botën me më shumë lehtësi, të gjejmë shijen e gjërave vërtet të rëndësishme. 

Si të menaxhoni stresin 

Krijoni ambientin 

Shpesh tentojmë të “vrapojmë” aq shpejt saqë në fund të ditës është e vështirë të jesh i/e qetë, ndërsa tensionet grumbullohen me rrezikun se mund të “mbytesh” brenda mureve të shtëpisë. Ndaj “përmbyseni” këtë mekanizëm. Shtëpia duhet të jetë streha e shpëtimit tuaj. Para së gjithash “kontaktoni” me ndjesitë më intime: hiqni orën e murit prej dhomës ku do të qëndroni, sepse boll keni “vrapuar” gjatë gjithë ditës. Hiqini rrobat e punës dhe vishni një komplet të rehatshëm për të qëndruar në qetësi gjatë kohës e cila do të jetë e gjitha për ju. 

Banjë relaksuese 

Çlironi tensionin 

Mendoni se qirinjtë dhe tajmanët janë të dobishëm vetëm në takimet e dashurisë? Nëse po, atëherë gaboni, sepse ata janë të përshtatshëm në çdo moment, sidomos kur mendimi ynë i vetëm është relaksi. Fikni dritat, ambienti do të jetë menjëherë më qetësues. Futuni në dush ose në vaskën e banjës, ku aty mund të shtoni ndonjë lugë kripë, vaj esencial trëndafilash, kanellë, kamomil etj. 

Kuzhina pa stres 

Detyrë apo kënaqësi? 

Ankthi dhe nxitimi i momentit të vaktit e zëvendësojnë kënaqësinë e të ulurit në tryezë, vetëm ose të shoqëruar, me një pjatë mjaftueshëm të ushqyeshme. Do të ishte mirë për ju që në mbrëmje të përgatisni receta të thjeshta dhe të shpejta. Ky është një zakon shumë i mirë për të kursyer kohë dhe për të ndikuar pozitivisht në procesin e fjetjes. E rëndësishme është që të gatuani pa stres, duke e shijuar plotësisht këtë moment dhe pse jo duke përfshirë edhe njerëzit që ju rrethojnë. 

Të shkruani ditar 

Vendosni rregull brenda vetes

Vazhdoni të rimendoni se çfarë ka ndodhur gjatë gjithë ditës? Ndonjëherë mendja përqendrohet te disa situata pak a shumë problematike. Për të “shpëtuar” nga to dhe për të gjetur lehtësinë, është e nevojshme që këto mendime t’i shihni qartazi. Sigurisht një bisedë me një person të dashur është shumë e dobishme për të parë me më shumë qartësi ngjarjet që ju nervozojnë; përveç kësaj, gjeni pak kohë që të përshëndeteni me personat që i keni larg e që i doni shumë. Megjithatë është e rëndësishme që të tjerët të mos i shihni si “valvul” shfrimi. Ndërkaq, sipas psikologëve, e rëndësishme është që të mbani një ditar, ku në të mund të “flisni” dhe për veten, të shprehni gjithçka ndieni dhe nuk ndieni.

No comments :

Post a Comment